23/03/2010

播放本新聞相關短片

任意網為:高學歷也訓街

小白觀點:貼錢買爛樓更加難受

有社區組織做咗個關於香港露宿者嘅調查,發現依家嘅露宿者唔單止愈嚟愈年輕,而且學歷愈嚟愈高,當中佔六成幾有中學學歷,認真得人驚。不過我懷疑最得人驚嘅係,可能其餘嗰三成幾有碩士、博士學歷!

窮途並唔係末路,做人唔可以咁灰,大不了咪學吓新加坡嗰個美少女咁,翹埋雙手唔做嘢,喺網上留言,希望全國人民一人捐一毫畀佢,等佢達成百萬富翁嘅心願。

不過喺香港地,有百萬身家連中產都唔算,更何況叫富翁,只係高過赤貧線啲啲,所以呢班露宿者未必身無分文。香港地係人都深受癲價樓折磨,得一百幾十萬,買層舊唐樓或者勉強夠,不過你要唔介意幢樓唔知幾時冧,隔籬又有鳳姐嗌到拆天至好喎。所以諗過度過,反正貼錢買難受,都係天為被、地為蓆瞓街好。

Blog:http://sunsiupak.blogspot.com

阿豪觀點:最安全城市非港莫屬

有社工組織調查發現,本港露宿者有三大趨勢,包括回流港人、在職貧窮同再露宿。嘩,有嘢做都要瞓街,咁仲點解咁辛苦打份牛工呢?

為咗解決呢個咁棘手嘅問題,嗰位早前建議將最低工資定為每粒鐘二十蚊嘅立法會議員,竟然話調查連鎖食肆嘅薪酬之後,唔排除會將個價再嗌低啲……

嘩,再咁搞落去,不如索性倡議大家做義工啦,雖然仍然係要瞓街,但係提升咗自我觀感,未嘗唔係一件好事。

話時話,特區政府正好可以用呢個調查嚟宣傳香港:你睇我哋香港,連低薪嘅非技術工種都有高學歷人士嚟做呀,可想而知我哋嘅人口質素幾咁高!仲有呀,都話香港係最安全嘅城市啦,好多市民唔單止夜不閉戶,有啲甚至索性連屋企都唔要,都一樣唔驚畀人謀財害命,問你服未?

Blog:http://lukchiho.blogspot.com

網友觀點

洪七公:後生仔怕父母管,收入夠玩又唔夠交租,咪要瞓街囉。

心思思:依家乜都貴,瞓街真係可以慳番唔少㗎!

賓仔:露宿者踢波叻又有學歷,真係唔可以睇小!

神父:問題係年輕人愛面子,想幫佢哋都難。