話說上周有兩隻香港漁船被內地人挾持，依家仲被扣喺內地。都咪話唔驚，挾持過程直情好似海盜片，十幾個內地漁民拎住刀或者水喉通衝上香港漁船，話漁船整爛咗佢哋張網，要求賠五萬元至放人。

其他本港漁民代為報警，點知香港海事處居然話件事喺內地海域發生，佢哋愛莫能助，只建議向內地方面求助。後來內地警方派海警截停隻內地船，救番被挾持嘅港人。

最離奇嘅係，內地警方連人帶船拉返汕頭港後，居然話係海事糾紛，唔涉及刑事罪，將班內地漁民放晒，反而扣住兩隻香港漁船，到依家都唔肯放。大佬吖，依家係香港漁民畀人勒索噃，點解反而扣留香港漁船o架？盲嘅都睇得出，係有人幫緊自己友啦。

正所謂人為刀俎，我為魚肉，事情發生喺人哋嘅地頭，香港政府又關人個關，漁民惟有望天打卦。其實咁嘅事已唔係第一次發生，內地海上「屈錢黨」橫行，專門搵香港漁船開刀，仲獅子開大口，搞到香港漁民有得震無得瞓。最弊嘅係，漁民就算畀人明屈，都求助無門，簡直好似孤兒咁，惟有自嘆倒楣。

講開又講，畀人屈嘅又點止漁民吖，隨着中港兩地往來日趨密切，愈嚟愈多港人北上打工、讀書、做生意，類似糾紛幾乎無日無之。港府數字顯示，舊年接獲逾六百宗港人喺內地遇事尋求協助個案，比上一年多一半，另外港府駐內地各辦事處亦收到三百幾宗投訴，其中四成涉及內地行政、執法及司法機構。

講真，喺內地生活嘅香港人都幾慘，出咗事都唔知搵邊個幫手。港府話就話喺內地開咗好多間辦事處，聲稱可以為香港人提供方便，但係港人真正搵上門嘅時候，佢哋就推三推四，就算肯幫，都慢幾拍。唔怪之得好多人寧願向議員、社工團體或者工會求助喇。

嗱，今次漁船被挾持事件就係一個典型畸士，港府駐內地機構依家仲未出面，坐視屈錢黨逍遙法外，搞到本港漁民團體忍無可忍，召集七隻漁船去汕頭港聲援被扣嘅香港漁船。堂堂特區政府，居然做縮頭烏龜，羞唔羞家呀！

所以話，做香港人有時都幾心噏。喺其他國家，國民喺外地遇到困難，政府必定第一時間伸出援手。但香港人喺外地出事，經常叫天不應，叫地不靈，例如當日泰國騷亂，港府遲遲唔肯派包機接人，令大批香港旅客滯留曼谷，卒之搞到有人客死異鄉，港府先至肯做嘢。

叮！天地不仁，以萬物為芻狗；政府不仁，以百姓為芻狗。計太一叮話齋，港府千祈唔好再吹水以民為本，否則，盞笑死人嘅咋！