小白觀點:練好體質核爆都唔驚

內地有人見坑渠水有咁多油脂，本住用得唔好嘥嘅環保原則，搵民間化學專業人士努力不懈咁將污水過濾、加熱再沉澱，終於得出畀人食嘅食油，據講連五星級酒店都有入貨。其實有乜咁出奇啫，喺內地食嘢預咗係咁㗎啦，唔好咁大驚小怪得唔得？

我覺得中國人長時間食食埋埋咁多垃圾，身體已經適應晒，有晒抗體，我懷疑，食得多潲水油炸嘅尿浸死貓肉，再食番用靚食油炸嘅真羊肉串，隨時會屙嘔肚痛都唔定呀。

計我話，中國人再食多幾代，體質更有機會翻幾番，脫離東亞病夫詛咒，如果不幸有朝一日發生核爆，全球人類瓜晒，連曱甴都冇運行，唯一能幸免於難嘅可能得番中國人，到時囉喎，好似哥斯拉咁日日食輻射維生，肥肥白白咁做地球霸主，你話幾過癮呢。

Blog:http://sunsiupak.blogspot.com

阿豪觀點:專家掃興兼製造恐慌

內地食品工業又有新猷，今次係喺渠道撈番出嚟循環再用嘅潲水油。雖然專家話毒性比砒霜強一百倍，但係老實講，依家內地食品樣樣都話有害，潲水油都算比較環保㗎喇！

嗰啲所謂專家又係衰嘅，冇嘢搵嘢嚟做，大家食得高高興興，你突然話大家原來飲緊坑渠水，真係情何以堪呢？

呢單嘢無聊就無聊在，你指出啲食油好有問題，另一方面又話冇方法可以check到，情況就好似話你聽依家通街都係偽鈔，但係無論用紫外光又好咩都好通通驗唔出，試問除咗引起群眾恐慌之外，又有咩用處呢？

依家咩都假，如果我開內地食肆，實會學吓啲髮廊咁—唔好心邪，唔係有另類服務—容許顧客自帶食油嚟幫襯，至於會唔會買到假嘢，咁就貴客自理喇！

Blog:http://lukchiho.blogspot.com

網友觀點

春仔：國內同胞食咗咁多毒嘢都面不改容，值得研究！

阿呆：啲奸商咁創意無限，用喺正途咪好囉！

狒狒：應該統計吓依家嘅中國人係咪較以往短命。

傻伯父：呢啲毒油都唔知有冇流入香港，諗落都驚！