美國前國務卿賴斯尋日到香港中文大學演講，中大前校長李國章都有捧場，中大現任校長劉遵義以主人家身份主持演講嘅問答環節。原來賴斯同劉遵義二人識於微時，事關佢哋擔任公職前都曾經喺美國史丹福大學教過書，賴斯教政治，劉遵義就教經濟學。尋日佢哋多年後重逢，不但表現得好雀躍，更不斷互笠高帽，賴斯仲大讚劉遵義領導中大有聲有色添。
但喺賴斯嘅演說結束前，有一名中大哲學系學生喺場內舉牌示威，抗議賴斯喺任內多次參與策劃侵略中東戰爭，爭在冇有樣學樣，好似早前有青年對住署理特首唐唐咁掟鞋。賴斯似乎冇畀突然發難嘅學生嚇親，事後仲話，有人抗議可凸顯民主社會嘅好處喎。
喺政壇打滾咗咁多年嘅賴斯，面對學生示威表現得從容不迫又大方得體，平時喺呢方面唔係太擅長嘅劉遵義，真係要好好向佢嘅前同事學吓嘢喇！