20/03/2010

播放本新聞相關短片

政情:李樂詩半年食一次肉

為減慢地球暖化,人人都講環保,推動環保嘅人就變得更加環保。有幾環保?作為環保先鋒嘅極地探險家李樂詩、天文台台長李本瀅同環境保護運動委員會主席李宗德,尋日出席一項環保活動時同大家分享環保妙法。李樂詩話自己環保咗二十幾年,出入只會行路同搭公共交通工具,半年先食一次肉,平時以素食為主。

李台長同李樂詩一樣係少肉多菜,晚餐食炒菜加紅米飯,夠晒健康,午餐連菜都唔食,只食一件果占多士,李台長話太太同仔女都好認同佢堅持環保。李宗德就話自己開始年紀大,平時食飯應酬點菜會清淡啲,少食油膩食物同肉類;佢仲有一樣環保秘技,就係出外食飯唔使侍應換碟,事關少用一隻碟就用少啲水洗,夠晒環保。

李宗德同李台長有一個共通點,就係平時盡可能選用汽缸容積較細嘅汽車,而李宗德更規定司機要停車熄匙,減少廢氣排放。