呢排唔同界別搞嘅春茗多到不得了，商界嘅春茗一浪接一浪，Yvonne職責所在係要同啲商界保持聯繫，佢當然盡量都去撐場啦，忙到氹氹轉外，仲喺盛情難卻下，都應該飲唔少酒落肚。不過，向來飲得嘅佢，早前喺三八婦女節酒會上竟然揸住杯清水。點解咁寡？

正所謂事出必有因，原來飲清水都係為咗身體健康啫！佢自爆一直受濕疹困擾，周身唔自在，睇西醫後略見好轉，但始終斷唔到尾。咁又真係幾難搞喎！所以佢近日決定轉睇中醫，仲煲緊中藥飲，而為免啲中藥嘅藥性同酒精有相沖，佢聽中醫師勸戒酒，一滴都唔飲。

咁戒酒辛唔辛苦呀？Yvonne笑住擰頭，話戒酒只係暫時性，唔代表以後唔飲得，淺嘗輕嘗都可以嘅。咦！咁睇嚟遲啲呢個女酒仙又會歸位嘞！