「80後」嘅「鋼琴王子」李雲迪將自己奉獻畀音樂，連愛情都放埋一邊。佢喺中港台日有唔少fans，每次被問起感情事，佢都係一貫口脗︰「太忙啦，順其自然吧！」早排佢嚟香港，講起戀愛狀況，佢有感而發話，依家一個月出門幾次，冇時間照顧另一半，唔可以同普通人一樣咁談戀愛：「要愛我是比較辛苦，但沒辦法。對於結婚生孩子，我沒有時間表。」
時下「80後」好講創新，鋼琴王子就話自己屬於思想傳統嘅一群，可能同佢喜歡古典音樂有關，佢鍾意維持藝術原貌，唔鍾意畫蛇添足嘅誇張，因此佢注重內涵，鍾意本質嘅嘢，覺得咁樣先可以歷久常新。佢話：「我不會追求潮流，可能比較悶，我不需要一個興奮點，可能再過十年我再看看自我的要求有甚麼提升，會發現不會有甚麼很驚喜，哈哈……」