今次展覽由游藝堂同香港蘇富比合辦，名為「天風薪傳」。日前相約兩位游藝堂揸Fit人、唐楚男同蔡克昭律師傾吓偈，唐律師笑言首次買畫時乜都唔識，隨意睇睇就買咗，結果買番嚟嘅全部係贗品，被呃逾二十萬元。痛定思痛下，佢於是拉埋蔡律師埋首猛刨名家書畫冊，做足功課。

唐律師自嘲係「驗屍官」，買畫前多番鑑證外，更託相熟朋友直接向當時仍然在生嘅張大千同趙少昂查證真偽，得大師點頭確認，先敢扑錘，至今好多都升咗值。不過唐律師話：「多多錢都唔賣，賣咗就買唔番。」自從張大千同趙少昂相繼去世後，冇咗大師確認，唐蔡二人已唔敢再買畫嘞。

個展覽喺四月二號揭幕，展期由四月三號至七號，而展覽完成後，部分藏品會送贈畀外國博物館，餘下嘅就送去英國收藏。