20/03/2010

播放本新聞相關短片

政情:畀街板玩謝議員狂炳林公公

公文袋、社民連策動所謂嘅五區「公投」認真累街坊,為咗五月中舉行嘅補選,政府要求所有立法會同區議會議員,喺今個月中之前拆晒啲街板,搞到班建制派立法會議員呱呱嘈。當局有見佢哋大力反對,於是延遲拆板期限至下禮拜五(二十六號),仲提出Plan B,容許議員唔使拆板,等尋日政制事務委員會傾完先算,結果政府一樣畀班建制派議員狂炳。

建制派議員反對五區「公投」不在話下,所以為咗舉行補選而要佢哋拎錢出嚟拆街板,梗係死都唔肯啦。不過,建制派議員素來聽話,叫得佢哋拆,佢哋都會照做,點知政府突然拋個Plan B出嚟,認真玩死人。

好似工業界議員林大輝咁,佢拆咗八十八塊、剩低六十九塊,認真唔嗲唔吊,佢當面同政制及內地事務局局長「林公公」林瑞麟講「唔鬧你都唔得」,話政府政治觸覺不足同後知後覺,唔應該一早就叫人拆,又話想講政府從善如流,但真係讚唔出。

大輝仲自嘲知名度低,好靠啲街板同市民溝通,依家拆晒都唔知點溝通。見大輝咁勞氣,林公公仲未識死,竟然話:「大輝你笑住口咁講,肯定會提高知名度。」

街板被刑毀檢控不力

滿肚氣嘅何止大輝一個,獨立議員葉劉淑儀早已拆晒佢喺港島區嗰一百七十五塊街板,盛惠三萬七千蚊,聽到都戥佢肉赤,咁政府係咪科番水先?「五區公投」總發言人余若薇亦話佢都拆咗部分街板,依家政府推出Plan B,等於懲罰守法嘅議員。

其實班議員一肚氣確實唔難理解,原來當局喺○八、○九年收到一百宗議員街板被刑毀嘅投訴,結果警方拉咗十五人,檢控咗九宗,得五個人被定罪。政府幫議員保護街板不力,拆街板問題又一時一樣,搞到議員使咗冤枉錢,唔畀人鬧就奇啦!

聽完班議員吐苦水之後,林公公話下個周末前會作出清晰交代。睇嚟佢下次真係要執生喇!