不過，有糧出唔等於有飽飯食。嗱，政府統計處舊年特別為制訂最低工資進行大型工資水平及分布調查，尋日公布嘅結果顯示，打工仔人工水平依然係三個字：奀過鬼。即係話，在職貧窮問題毫無改善。

舊年第二季，全港近二百八十萬打工仔嘅整體時薪中位數係五十八蚊五毫。同樣打份工，教育及公共行政、金融及保險等行業嘅時薪中位數超過一百蚊；低於五十蚊嘅包括保安及清潔服務、飲食同零售業等，其中保安同清潔工人時薪連二十八蚊都唔到。

如果按勞工界要求嘅最低時薪三十三蚊計，全港有近四十七萬打工仔人工低於呢個水平；即使按部分商界人士提出嘅二十四蚊計，依然有超過十三萬人搵唔到呢個數。同樣令人震驚嘅係，最低同最高教育程度僱員嘅時薪中位數相差超過兩倍。愈窮愈讀得書少，教育程度愈低就愈窮，惡性循環落去，有乜可能唔出現隔代貧窮吖。

唉，家陣人工真係好似歌神許冠傑話齋「慘過滾水淥豬腸」，愈來愈縮，低下階層嘅收入根本不足餬口。有家庭為維持一家六口生活，雞碎咁多都要啄，兩公婆夾埋要打四份半工，每日做近十六個鐘至賺得嗰萬幾蚊，勉強維持一家人生活，呢啲咪係典型嘅在職貧窮囉。

睇番統計處最新數字，時薪得廿幾蚊，連養自己都掹掹緊，莫講話養全家，但咁嘅工一樣有人做。前排本港某大學嘅餐廳畀人踢爆，樓面清潔員工每日工作十個半鐘，但時薪得十七蚊四毫，咁低人工，簡直係香港嘅恥辱。

據講，統計處會將數據交畀臨時最低工資委員會參考，以便當局下半年訂出首個最低工資水平。本來，社會各界對係咪訂立最低工資意見分歧好大，反對聲音唔少。好多人擔心最低工資卒之會變相淪為「最高工資」，打工仔未必有着數。況且，勞工界同商界分別提出三十三蚊同二十四蚊嘅時薪標準，一個開天索價，一個落地還錢，兩者差距咁大，根本大纜都扯唔埋。

太一叮真係要點醒港府，咪諗住求其敷衍吓市民，最低工資嚟個中間落墨，係咁意噏個數就算。呢件事關乎全港打工仔嘅福祉，處理唔好會令貧富懸殊加深，造成社會分化。為咗打工仔出咗半斤力可以攞番足八両，唔該班薪高糧準嘅高官呢次認真做好你哋份工。叮！