小白觀點:淋血都冇用何況髹紅甲
本地一間航空公司嘅空姐不滿資方新政策，喺facebook開咗個反對群組，仲醞釀緊搞工業行動，準備號召髹紅色指甲油開工同埋戴口罩咁話。好心啦，搞工運唔係請客食飯咁簡單，睇吓泰國吖，用百萬毫升鮮血淋總理府都冇用啦，更何況係髹紅指甲油咁溫和嘅抗爭行動，邊得㗎！
幾十年前做空中小姐就話係尊貴啫，小白老弟睇過一張舊相，相中有位美女空姐企喺艙門，嘩，真係貴氣到無倫呀，唔講真係唔知，原來呢位空姐係白韻琴，當年係美國三藩市州立大學傳播系高材生呀，真係唔講得笑。
之不過，近年空姐嘅質素愈來愈差，地位亦一落千丈，計我話，有時戴口罩仲好添，因為依家好多空姐都黑口黑面嘴藐藐，好似唔係好願做咁，遮住唔使令乘客喺旅途中不安，未嘗唔係好事喎。
Blog:http://sunsiupak.blogspot.com
阿豪觀點:教用facebook原來有妙用
有航空公司嘅空姐不滿新編更制度，打算發起工業行動。工業行動唔奇，依家好多國家都有航空公司鬧工潮，但係據講呢間航空公司有員工透過facebook組織動員群眾。如果真係成事，又會唔會揭開工運新一頁呢？如果呢次行動真係成功，工會好應該將佢列為一個經典教材。
原來facebook咁多妙用，所以之前豪伯都話，BBC都要花錢幫員工上堂，教佢哋用facebook，都係為咗公司利益着想，等佢哋學識誠實使用電腦，以免公司利益受損。如果呢間航空公司一早學吓人哋咁搞類似課程，或者就唔使搞到今日咁呢？
不過話時話，佢哋準備髹紅色指甲油同戴口罩抗議，到底同佢哋爭取嘅議題有咩關係呢？唔通班空姐戴口罩又係因為整損塊面，唔想人哋誤會係公司造成嘅？
Blog:http://lukchiho.blogspot.com
網友觀點
搞搞震：人愛跟風，用facebook搞事陸續有來！
龍陽哥：勞資雙方有深層次矛盾，唔係點會成日搞工業行動吖。
周仔：贊成空姐戴口罩，可以唔使睇到佢哋黑口黑面。
何平平：郁吓又話罷工搞行動，以乘客作為談判籌碼真不該！