KK仲感慨依家唔少人大、政協當正兩會係一個一年一度嘅交際平台，唔少人朝早開兩會，夜晚就搞晚會，有時仲一晚幾個，同人食飯嘅時間分分鐘拍得住開會時間；加上開一次兩會動輒用成三萬工作人員，再計埋酒店住宿、膳食、場地布置等，開支高達幾千萬元。佢建議，往後各區人大、政協留番喺原地開會，處理全國性議題時先用視像會議討論，再透過電子系統進行投票，等國家可以慳番啲資源，人大、政協就節省開會同應酬時間，一石二鳥。

不過，另一港區全國政協委員陳鑑林反而好珍惜兩會期間有機會同各地官員交流，話唔會視之為繁文縟節般嘅應酬，仲話兩會處理嘅問題嚴肅，唔應該用視像會議取代，佢反問：「立法會會議可唔可以用視像會議吖？」