經濟動力同匯賢智庫又計劃喺四月舉辦大專生考察團兼坐高鐵，點知經濟動力搶先一步，喺復活節假期舉辦一日「世紀新視野」計劃珠三角考察團，仲以每位大專生一百元象徵式收費搶爛市，結果參加者多到要三、四架旅遊巴先坐得晒。
經濟動力個考察團定於下月六日起行，由林健鋒帶隊，由香港坐直通旅遊巴直達東莞，參觀經濟動力成員、廠商會副會長顏吳餘英開設嘅玩具廠，跟住聽取工廠負責人分享港商喺珠三角經營面對嘅困難，以至人才需求同就業前景，廠方仲安排大專生到工人飯堂食午飯，體驗工人生活。下晝會由廣州南站搭高鐵到韶關，參觀城市規劃同景點。
相對匯賢智庫嘅考察團較長途，到武漢考察三日，會參觀武漢大學、鋼鐵廠、農村建設及黃鶴樓等，但團費就要畀足二千五百八十元，即係主席葉劉淑儀冇慷慨貼錢畀大專生。