原本尋晚出發去日本嘅立法會議員林大輝，係要為十日後出戰日本高松宮紀念盃嘅愛駒「極奇妙」打氣，但尋晚竟然喺新界潮人總會春茗見到佢，唔通佢喺日本問多啦A夢借咗「隨意門」返嚟？
非也！大輝根本冇去日本，事關今次出賽嘅除咗「極奇妙」外，仲有馬王「蓮華生輝」，但「蓮華生輝」出發前絞腸痧要做手術，出唔到賽，大輝一直都係諗住陪太子出戰，依家「馬王」唔去馬，佢話自己隻愛駒只係「妹仔」，去嚟都冇意思，所以決定同「蓮華生輝」共同進退，唔去日本出賽。
大輝仲講笑話「極奇妙」已經七歲仔，年紀唔細，家陣唔使舟車勞頓，連愛駒都心情靚靚，講唔定喺香港會跑番幾場頭馬返嚟威威添！