建議車門加刀片

港鐵上個月喺facebook開設咗官方「鐵路粉絲專頁」（The Official Fan Page），上載咗唔少港鐵活動資料同有趣嘅宣傳短片。專頁內冇特別就高鐵或其他新鐵路線諮詢市民，只提供咗港鐵官方網頁嘅連結，至尋日吸引咗逾二千名「擁躉」，當中有人「惡搞」港鐵，建議喺車門上加裝刀片，縮短列車停站時間，並設計了一張模擬圖片上載到專頁。港鐵方面話喺facebook設專頁主要係增加同網民及鐵路迷嘅接觸，唔係為新鐵路線做宣傳。

之不過，「80後」都唔受喎！仲話明唔會參與有關專頁，批評只係公關技巧。反高鐵青年成員陳景輝就話興建高鐵破壞他人家園，至今最急切嘅已經唔係溝通，而係安排第三方專家監察工程對大角咀樓宇嘅影響。佢又話：「我哋依家唔需要傾偈，反對意見一早畀咗，係政府同港鐵唔理呢啲聲音，你叫老人家上網傾乜嘢呢？」