周總同班就嚟畢業嘅大學生講，佢哋依家正好係乾卦初爻所指嘅「潛龍勿用」，即係佢哋雖然有自己嘅思想，但未夠經驗，唔應該過分表現自己。當佢哋工作多十幾、二十年，能力有所提升時，欣賞同不滿佢哋嘅人亦都與日俱增，故要時刻警惕自己。咁踏入中年，更要力爭上位，「或躍在淵」，成功嘅話就能夠「飛龍在天」。

借周松崗食住上

不過，最後一爻竟然帶有負面意思嘅「亢龍有悔」，即係雖然佢哋已經攀上高位，但身邊嘅人一係就唔服佢，一係就對佢唯唯諾諾，而有能力嘅人又離佢愈來愈遠，所以衰落之期好快到，聽唔到反對嘅聲音，咁處事就要小心為上喎！

咦！講到呢度，周總係咪似有所指呢？咁就只有佢自己先知嘞！但聽落真係好似講緊一個人噃，而同場嘅經濟動力核心成員、立法會議員林健鋒唔知係咪想抽水，竟然燒到去犯眾憎嘅煲呔曾嗰份，佢話煲呔曾應該嚟聽吓喎。咁即係借周總去暗寸煲呔曾啫！

講真吖！煲呔曾上場咁多年以嚟，把口就掛住「做好呢份工」，但實情係愈做愈差，不單止抱住少做少錯嘅態度，倒行逆施激起民憤，加上多番唔聽人意見，最後搞到眾叛親離。

正如，一班「80後」青年多次示威都衝住佢而嚟，仲史無前例咁圍剿禮賓府；就連本應同坐一條船嘅行會成員，亦就復建居屋等議題高調同佢唱反調。好明顯，煲呔曾已經難以服眾，近期仲抱住提早收工嘅心態，早前接受一份本地報章訪問時，仲話朝朝早起身都諗住退休，可能佢真係會一如籤文所指，衰落之期不遠矣。