立法會尋日審議將舊樓強制拍賣門檻由九成降至八成，議題咁惹火，議員實嘈到拆天啦。呢嗱，佢哋提出咗多項修訂，有議員促請當局撤回議案或者押後實施。議事堂出面更熱鬧，分別有支持同反對降低門檻嘅市民請願。

立法會內外各自各精彩，不妨睇吓班高官又有乜搞作。發展局局長林鄭月娥呼籲議員唔好感性凌駕理性，將議案理解為強搶民產同官商勾結，仲強調自己身為問責官員，唔能夠議而不決。

咦，「好打得」局長依然咁打得噃。梗係啦，自己親自操盤，又有建制派護航，估計手頭有足夠票數，定過抬油，「強拍條例」最後順利過關。如果唔係，之前邊夠膽去到咁盡，企硬「不撤回」、「不修訂」、「如被否決任內不會重提」呀？

叮！咪扮嘢啦，就算當局呢鋪議而有決，都改唔到決而不行甚至朝令夕改嘅本性啦。呢，上環永利街重建峰迴路轉，話咗拆又唔拆，就係新鮮滾熱辣嘅例子嘞。

市建局前日突然宣布「原汁原味」保留永利街，主席張震遠仲話，改變初衷係回應民意，唔係出於政治考慮。唉，真係此地無銀三百両，連唔應該講嗰句都噏埋出嚟。

嗱，港產片《歲月神偷》上個月喺柏林影展攞咗個水晶熊獎之後，唔少人要求保留永利街。張震遠呢頭一口拒絕，話「唔可能做到一半走咗去」；林鄭月娥嗰頭就話，永利街可以整體保留。市建局呢次直頭畀人跣鑊甘，無端端做咗醜人。

講真，冇政治考慮就假嘅。如果唔係《歲月神偷》揚威柏林，唔係當局想以保育永利街嚟討好立法會，減低「強拍條例」嘅反對聲音，永利街拆硬啦。

一直以來，曾蔭權政府制訂重大決策，最主要嘅考慮唔係市民利益，而係政治壓力。開始嗰陣，往往冇經過足夠諮詢就拍板，但聞到少少燶味，一聽到反對聲就窒住，隨時轉軚。

好似降低強拍門檻咁，唔少市民尤其係舊區居民都好支持，但當局怕畀人鬧「官商勾結，強搶民產」，於是就突然改變強硬立場，允許永利街全條保留。

轉軚容易，但凡事有利必有弊，之後出現問題點辦，政府似乎冇答案。嗱，原來想賣樓嘅業主賣唔到；啲唐樓又殘又舊，唔及時維修隨時變危樓，呢啲問題港府打算點解決？又點避免土瓜灣唐樓冧樓悲劇重演？

決策唔理市民整體利益，只諗政治，左變右變令市民無所適從，仲幾乎鋪鋪臨尾香。高鐵工程徵地，清拆菜園村變咗「複製」一個；降低舊樓強拍門檻，「搭單」帶挈永利街唔使拆。一次係咁，兩次又係咁，呢個政府真係愈睇愈似跛腳鴨。叮！