香港人對越南難民絕對唔陌生，不過，時移世易，家吓再咁叫可能惹嚟麻煩。保安局局長李少光尋日喺立法會被議員質詢點解越南人來港要簽證，回應時就誤將「越南國民」講錯為「越南難民」，搞到畀議員寸佢講漏嘴，跟住幾次提到都要特別小心。
「橄欖」陳鑑林尋日喺立法會質詢當局係咪歧視越南人，入境要簽證，同其他地區旅客嘅免簽證待遇唔同。李少光解釋話過去五年，香港平均每年約有五百六十名犯事者係越南國民，非法入境者有五百四十人，而東盟十國對越南人入境亦有簽證要求，所以政府並冇歧視。可惜佢講越南國民時，噏錯越南難民，搞到有啲尷尬。「橄欖」講笑咁話，越南嘅經濟已經唔同晒，唔該大家對越南人嘅目光都改改啦！