舊年本港主辦東亞運動會，喺足球賽奪金，令各界再度關注足球運動前景。尋日立法會民政事務委員會討論顧問研究建議，香港足球總會（足總）主席梁孔德都有出席會議，太太「蘇菲」梁劉柔芬亦係會議成員之一，但呢次顧問研究嘅始作俑者蘇菲全程一言不發，只係默默坐喺度撐老公。佢事後解釋，唔問問題係費事申報自己係足總主席嘅太太喎。
立法會尋日朝早八點半討論呢個顧問研究，吸引唔少球迷到現場旁聽，當中包括退役本地名將山度士。蘇菲同我哋講，山度士現身無非係撐梁孔德場，仲話見到唔少球迷咁關心本地足運感到好開心。
蘇菲前年提出推動本地足球發展嘅動議辯論，當中建議政府就足運發展做一次詳細研究，最後仲獲得立法會通過。等咗兩年，呢項研究嘅結果卒之喺上個禮拜出台。