政改大龍鳳已拉開序幕，隨住補選日子臨近、溫和方案出台，政壇又吹起和風。日前政制及內地事務局局長林瑞麟去見白鴿黨，希望透過「溝通」，拉攏白鴿黨九票成全政改方案，雖然佢呢次偏向虎山行嘅結果冇壞消息，但記者會安排現凶兆，泛民圈中更有消息話佢可能會遇上攔路虎添。
前晚會面後，林公公舉行簡單記者會，身後嘅門上大大隻字寫住「此路不通」，好似暗示佢同白鴿黨嘅溝通此路不通咁。更大吉利是嘅係，此路不通下面貼咗幅年畫，上有兩隻老虎，唔通係話政改溝通此路不通，兼且有「攔路虎」？
如果係嘅話，攔路虎係邊個呢？有人話係策動「五區公投」嘅公文袋同社民連，亦有人話係白鴿黨嘅強硬派，因為該黨對政改方案現分兩派，一方認為再搞對抗冇前途，只要中央求其肯釋出善意就收貨；一方係強硬派，堅持中央若唔讓步，白鴿黨應寸步不讓，唔係民主派第一大黨幅招牌就會散晒。不過，白鴿黨「文膽」張文光話乜都唔係，兩隻攔路虎其實係一七年普選特首同二○年全面取消功能組別。