北京兩會已閉幕，富貴黨前主席田北俊同前副主席「莎姐」周梁淑怡都係全國政協，佢哋趁上禮拜五有半日空檔，由北京搭高鐵去天津，佢哋十一點四十分鐘先喺北京南站出發，只需二十八分鐘就抵達天津，仲夠時間食午餐，於是去品嘗天津地道嘅狗不理包子，五種餡料包括菜肉、醬肉、蝦肉等，莎姐大讚好味。
莎姐尋日出席一項保障知識產權活動，大讚北京高鐵車站大堂靚得好緊要，媲美北京機場三號客運大樓。佢記得丈夫周明權以前成日穿梭於北京同天津公幹，每程車開足兩粒幾鐘，依家二十八分鐘就到，不禁驚嘆國產列車水平。莎姐爆料話田少試搭高鐵時好興奮，期間獲悉自己連任旅發局主席就更開心，仲喺電話度大大聲同記者講自己搭緊高鐵添！
香港知識產權會同台灣著作權保護基金會合辦一項以「知識產權」為題嘅短片製作比賽，身兼香港知識產權會主席嘅莎姐尋日主持啟動禮，佢話活動為年輕新一代提供交流機會，令佢哋了解到保護知識產權嘅重要性。