瑪麗醫院新「一哥」兼港島西聯網總監即將換人，現任九龍東聯網總監陸志聰醫生（CC，圓圖）嚟緊五月一號就會履新。尋日佢同記者茶敍，講到未來大計，CC似乎對瑪麗嘅好多嘢都睇唔過眼，認為間醫院又殘舊又落後，雖然有重建嘅諗法，但瑪麗附近想搵笪空地都難，院內又有幾幢已列為古蹟嘅歷史建築，一定唔拆得，所以即使重建，都要再動腦筋。
今個月二十六號，CC會最後一次以九龍東聯網總監兼聯合醫院總監身份返工；二十九號朝早，佢又會同醫管局主席胡定旭同行政總裁蘇利民去浩園拜祭沙士殉職醫護人員；跟住就即刻飛去倫敦，考察當地嘅教學醫院運作；逗留三日之後，再飛去美國哈佛大學修讀兩個月高級管理學課程，行程好緊密。
講到履新後驚唔驚鎮唔住港大醫學院班教授，CC話，佢已經同醫學院院長李心平見過面，亦同部分教授傾過偈，覺得全部人都好友善喎。