立法會審議條例時，泛民議員大都反對，建制陣營都有議員唱反調，包括早排點名批評林鄭嘅匯賢智庫葉劉淑儀同詹培忠等。議員發言時有啲指摘林鄭態度強硬，話佢威脅條例如被否定，兩年之內唔會向立法會提交修訂，質疑佢係咪太好打，剝奪人哋資產都咁橫蠻。

林鄭回應時主動呻苦，話自己深受好打得呢個形象嘅苦，其實佢唔打得，「睇我今日聲都沙埋……」講到政府兩年之內唔提交修訂案時，佢解釋任期剩低兩年，冇可能喺兩年之內再提交強拍修訂案上立法會喎。

被質疑逃避立法會問責

啲議員繼續發難，輪到金勞詹時，佢話：「《基本法》係保障市民私產嘅，但你哋（政府官員）有利時就話《基本法》，無益嘅時候就係劉皇發……」引嚟議事廳一陣笑聲，而畀佢無啦啦點名嘅發叔啱啱唔喺議會。另有議員辯論時大翻林鄭舊帳，話佢早兩日出席電台節目推銷強拍時，口口聲聲「為民請命」：「奪人產業嘅行為都叫為民請命？我當時揸緊車，真係嚇咗一驚，幾乎撞車添！」

議員疑慮多多，甚至批評當局以公告手法提交條例畀立法會，係要逃避立法會問責，會議氣氛有時火爆、有時譏諷，林鄭支撐到夜晚已經疲態盡露，睇嚟，孭住好打得高官個名真係唔容易噃！