撲滅火災係消防員嘅天職，問題係，犧牲本來可以避免。嗱，楊俊傑就死得好唔抵。當日佢喺火場畀雜物壓住身體，Call人嚟救，可惜裝備鬼死咁落後，懷疑通訊接收器有盲點，又冇定位，卒之同袍兩粒鐘之後先至搵到佢，抬出嚟已經救唔番。

咁仲未算，家陣又爆出更得人驚嘅消息，話當日救火現場指揮官曾經用消防車嘅電腦向總部控制中心發訊息，將火警升為三級，但消息傳到控制中心，懷疑擺烏龍刪咗，結果延遲咗二十分鐘先至升為三級火警。

咁就弊傢伙，按照消防條例，二級火警升三級火警，總部須加派一百名消防員，帶五至十條消防喉去現場。如果呢批生力軍及時趕到，成個形勢就唔同晒。正如有消防員話齋，短短二十分鐘已係兩個世界，當時火場溫度冇咁高，通道亦比較順暢，楊俊傑可能唔會畀雜物壓住。可惜成件事已經唔可以返轉頭嘞。

話時話，火警升級咁重要嘅訊息，點會咁容易被誤刪㗎？據講係咁嘅，總部控制中心第三代調派系統動作慢，不時要刪除無用指令，減輕電腦負荷。火警升級訊息傳嚟嘅時候，操控電腦嘅人剛啱清理緊無用指令，唔覺意將現場發嚟嘅訊息都刪埋。嘩，咁咪即係倒沖涼水連個BB都倒埋？人命關天，點可以咁兒戲㗎！

太一叮發夢都冇諗過，指揮全港消防行動嘅控制中心居然會七國咁亂，咁搞法，即係攞市民條命嚟較飛啫。亂不特止，聽講人手亦唔夠，得廿零人當更，而警隊嘅九九九熱線就有一百八十人當更，相差天共地。

人手不足忙中有錯，可能係事實，但係幾忙都好，都唔應該將火警升級咁重要嘅訊息刪錯，若果有關指控屬實，唯一解釋係，控制中心人員返工時喺度遊魂。

叮，件事嘅真相究竟係點，只有消防處高層至知，消防處處長盧振雄係咪應該出嚟澄清吓先？如果真有其事，就應該快快趣趣做全面檢討，唔單止要更新調派系統，仲要向相關人員問責。如果人手唔夠，就要出聲，政府又唔係冇錢，庫房浸到瀉，唔通留晒嚟為公務員加人工咩。

一句講到尾，唔可以再無情白事製造烈士嘞，否則再多幾個浩園都唔夠，咁多同袍枉死，盧處長瞓得安樂咩？叮！