政府經歷○五年政改方案被泛民綑綁式拉倒嘅慘痛教訓，認定逐個向獨立泛民主派議員游說嘅「拉散票」方式，既費力又容易被擊破，當年一個譚香文反面，就拉散其他本來到手嘅五票。所以，今次政府改變玩法，集中火力攻白鴿黨，意圖一口氣拿下九票，咁就定過抬油。但係到目前一刻，政府同白鴿黨嘅關係相當曖昧，處於「雙方有誠意，結婚冇銀紙」嘅尷尬局面。
呢個世界好現實，政府同白鴿黨就算喺政改上郎情妾意，政府如果冇豐厚「禮金」，現實嘅白鴿黨唔白鴿眼先奇。但有消息稱，政府依家口袋入面只剩得一個籌碼，就係建議以比例代表制互選六個區議會代表議席。
消息指出，建制派經歷○三年區會大敗教訓，猶有餘悸，所以傾向採用比例代表制，推算如果二○一二年政改方案通過，六個區會代表議席，建制派同泛民將係四二比。即係話，泛民中地區樁腳最強嘅白鴿黨，至少分到一個議席，甚至兩個。
有白鴿黨人話煲呔曾呢粒糖好睇唔好食，日後互選六個區會代表時，建制派鐵票大派用場，而泛民一盤散沙，一旦協調唔到，有六、七人參選攤薄票源，泛民隨時一席都冇，所以白鴿黨仲未諗得掂。