行政會議召集人CY梁振英尋日同一個「80後」青年真情對話時，就勁讚香港年輕人嘅語言能力高，比內地嘅青年有優勢。面對青年人難上位嘅困局，CY就寄語佢哋要放眼國際，唔好局限自己喺香港呢個彈丸之地；又教佢哋要學識走位，先可以發圍，「一道門閂咗，總有第二道門開畀你哋」。擺明想拉近同班「80後」嘅距離啦！

「80後」青年上樓難，當年有份促成「八萬五」嘅CY就認為呢個結，政府、青年同佢哋嘅家人都有責任。佢鼓勵時下嘅年輕人唔好自怨自艾，要積極面對人生。

咁前排有「80後」青年向政務司司長唐唐掟鞋洩憤，但唐唐就當見唔到咁，事後仲畀做過保安局局長嘅立法會議員葉劉淑儀批評佢淨係識得背書。雖然CY同青年對話時冇畀人掟鞋，但佢講笑咁話如果畀人掟鞋嘅話，佢會一手接住隻鞋喎。

眾所周知，唐唐同CY都係疑似特首參選人，CY咁講，唔通係寸緊唐唐冇膽接招？