教路「起底」最和味

雖然馮醫生唔係原居民，但講到盆菜，佢都好識食。佢話食盆菜唔好咁斯文，一定要「起底」，由盆底最底嗰層將啲餸菜翻出嚟，因為呢啲食物先至最入味、最好食。馮醫生唔算大食，佢坐嗰圍枱摷晒底食咗大半盆，就宣布投降。

馮醫生作為主人家，盆菜宴後仲安排餘興節目，介紹祠堂特色，佢充當旅行團領隊，由村長當導遊，講解圍村多個景點。

原來粉嶺圍嘅彭氏宗祠有一百六十幾年歷史，係香港一級受保護建築，而粉嶺圍發展至今，仲保留部分圍村嘅圍牆。

圍村前有三支古炮，喺清朝康熙年間買入，用嚟對付盜賊，日軍佔領期間埋喺地底，直至圍村重建時至重見天日。