話說早幾年首部豐田第一代Prius由前環境運輸及工務局局長廖秀冬率先使用，後來政府大力推動環保車，但只豁免公共小巴首次登記稅，當時KK好不滿，認為免稅範圍應擴大至所有首次登記嘅環保私家車，但政府一口拒絕，指市面只有一至兩間公司提供環保車，免稅會予人感覺政府明益兩間公司。

特價買車以為執到寶

KK不服，親身走上豐田了解吓混燃車銷售情況，豐田見佢咁有興趣，二話不說將當時公司用開嘅最新第二代Prius借畀佢試揸兩個禮拜，KK唔揸猶自可，一揸就覺得好過癮，最後豐田將車價二十五萬減到二十萬賣畀佢。起初佢以為執到寶，點知冇耐政府宣布一併豁免環保私家車首次登記稅，搞到佢變相買貴車。

環保混燃車車價一向貴過普通電油車，KK部車就貴咗十萬蚊，話就話慳油，但佢粗略估計，要慳足五年至抵銷到十萬蚊差價，慳到第六年先開始有得賺。

但KK可能計錯數。據講有車主揸咗四年就要換摩打電池，盛惠五萬蚊，依家KK部車揸咗約兩年，即係兩年後可能要科水換電池，到時要揸多三至四年，可惜四年後又可能要再換電池，連同其他汽車維修費，條數計極都計唔完。嗱！呢啲就叫做貪字得個貧嘞，亦都可以話係環保嘅代價。

咁呢次佢喺立法會提出質詢，為自己請命涉及利益衝突噃！但佢就話樓就要申報利益啫，但冇話連車都要喎！再講，佢都係為同類車主關注有關問題，而佢咁啱都係車主嚟，若果有乜問題，佢都算係苦主之一啦！