小白觀點：微軟CEO要學中國文化

話說喺微軟一個年會度，有個員工見到CEO現身，當然希望可以同老細合照，遲吓開涼茶舖都可以掛出嚟叨吓光吖，殊不知阿CEO先生一見個員工部手機，當堂怒從心上起。鬼咩，原來好衰唔衰拎住微軟世仇Apple出嗰部iPhone，咁反骨，你話唔嬲就假囉。

小白老弟覺得，CEO嘅表現未免有啲失儀，如果唔怕悶，我建議佢應該聽吓溫家嫂講授中國文化哲學，自會明白大家喺埋同一間公司同舟共濟，We are in the same boat，「雖有小忿，不廢懿親」吖嘛，唔使去到作狀要踩爆人哋部iPhone咁絕啩，大不了咪花兩個月時間，搜集呢位鬼佬志雲吃裏扒外嘅證據明做佢囉。至於做員工嘅，呢劑雖然好明顯斷正，但輸人唔輸陣，大可回贈番一句「人或加訕，心無疵兮」，畢竟iPhone實在好用過Windows Mobile，問心無愧吖！

Email：sunsiupak@gmail.com

Blog：http://sunsiupak.blogspot.com

阿豪觀點：萬梓良拍埋去都變乖仔

內地官員鬧記者兼搶埋對方支錄音筆，結果犯晒眾怒；無獨有偶，微軟舊年9月開職員大會，會上有人用iPhone為總裁保曼影相，保曼當堂火都嚟埋，一嘢搶咗部iPhone，仲放喺地上作勢要踩爛佢添！

又難怪嘅，大家不妨上YouTube搵吓此君嘅短片，一條寫住「Steve Ballmer going crazy」嘅短片，場景相信又係微軟開大會，片中只見保曼喺台上大叫大跳成分鐘咁滯，然後又無端端大嗌「I love company」，萬梓良拍埋去都當堂變得溫文爾雅，可見佢其實係一個性情中人。

再講，保曼之前一直好睇唔起iPhone，仲笑人又貴又冇Keyboard，一定唔會流行。依家呢個評價已經成為全球笑柄，仲攞個iPhone出嚟影佢，真係五行欠打咩！喺度惟有祝嗰位員工好運，唔好畀人炒魷魚啦！

Email：lukchiho75@hotmail.com

Blog：http://lukchiho.blogspot.com

網友觀點……

狒狒：會唔會總裁同班員工做場戲，表明同對手勢不兩立呢？

海公公：想做個出色擦鞋仔，當以此為鑑呀！

秋香：咁唔識撈㗎，就算用緊iPhone，都整部假嘅WM手機充撐吓場面吖嘛！

華老爺：呢個CEO喺傳媒面前笑口淫淫，原來咁唔好老皮。