旺角道舊年六月有架綠色小巴剷上行人道，好似打保齡球咁，造成兩死八傷慘劇。呢單畸士日前宣判，肇事司機危險駕駛導致他人死亡罪成，法官直斥被告因剎那衝動，一時貪快，令兩個家庭永遠破碎，仲形容佢係「手執軚盤猶如手執利刃濫殺無辜」。法官講到義憤填胸，點知結果只判被告入獄三十二個月，停牌四年。平均害死一條命坐監十六個月，唔怪得死者家屬當場質疑「有冇搞錯」。

冇搞錯，香港司法就係咁仁慈嘅喇，佢哋對危險駕駛導致他人死亡罪，不嬲都判得好輕。前年西貢發生旅遊巴車禍，司機嚴重超速，造成十九人死亡，但只被判入獄三年零四個月，停牌三年，死者家屬聞判後噓聲四起。

香港話就話係法治之都，但法官判刑往往高高舉起，輕輕放低。嗱，同樣係經濟發達地區，日本危駕致死罪嘅最高刑罰已經提高到二十年。美國有啲州仲犀利，酒後駕駛害死人被視為蓄意謀殺，最高刑罰係死刑。

而喺香港，危駕致死罪最高刑罰話就話已由判監五年提高到十年，但咪又係得個講字，最高刑罰永遠都係形同虛設，例如旺角道呢單畸士造成嚴重傷亡，結果連最高刑罰嘅三分一都唔夠，點會有阻嚇力呀？對死者家屬及傷者又點樣交代呀？

更令人諗唔明嘅係，被告曾有多次違例駕駛紀錄，屢罰屢犯，卒之搞到咁大鑊，就算終身停牌都唔算過分啦。停牌四年喎，四年後咪又係一條橫衝直撞嘅好漢！

講到停牌呢家嘢，實在兒戲到唔使恨。舊年平安夜，有私家車司機涉嫌醉駕撞死一個中學教師。警方將司機拘捕，但預料要半年後先至調查完畢告上法庭，即係話，喺呢半年當中，涉案司機一樣可以揸車，萬一有人喺呢段期間又出事撞死人，呢隻鑊由邊個孭先？

俗語有話，對罪犯仁慈，就係對人民殘忍。當局對危駕人士咁手軟，其實係靠害市民。講真，今時今日，香港地真係處處危機，冇乜安全感可言，行行吓街隨時飛來橫禍，大家惟有打醒十二分精神，自求多福啦。叮！