小白觀點：庸官照升職半價都做

薪常會公布政府入職薪酬調查，以後大學生打政府工，月薪至少減兩千蚊，搞到呢班天子門生牙痛咁聲。唉，好心啦，依家嘅大學生含金量今非昔比，放眼祖國，好多名牌大學畢業生做餵豬、洗廁所、斬豬肉，仲可能隨時收唔到錢，為咗追十蚊八蚊欠薪畀工頭打死呀！所以呢，其實碌到入去政府，一人公僕，全家光榮，可以講得係幾生修來嘅福分啦。

冇錯，內地做官係發過豬頭，但你睇嗰個天下第一倒楣蛋孟學農，衰咗都要做吓樣丟官吖，但係喺香港做官，做錯嘢唔使炒魷不特止，只要跟啱條線，隨時連升幾級，而且郁啲就話冇士氣等退休，更盞鬼嘅係，時不時仲會有人幫口抱不平話「官不聊生」，咁嘅工邊度搵呀？計我話，莫講收少兩千吖，小白老弟頂爛市收少一半都肯做！

Email：sunsiupak@gmail.com

Blog：http://sunsiupak.blogspot.com

阿豪觀點：大學生被剝削慘過保安

啱啱至開完個乜鬼嘢「青年峰會」，唐唐呢位大替工畀青年大大力用鞋掟，抗議自己成日搵唔到工做。唔知係咪知道年輕人嘅怨氣實在太大，當局日前政府入職薪酬調查，新入職嘅大學生打政府工，月薪要減成二千蚊。釋出嘅訊息就係：嗱，細路，家陣唔單止出面世界難撈，政府都一樣唔好環境㗎咋，你哋都係睇開啲啦！

老實講，呢吓真係典型嘅無良僱主呀。雖然公務員始終係薪高糧準，恨得唔少人牙癢癢，但係政府咁做，心態無非係恰新入職嘅o靚仔，擺到明係話：咁唔妥唔好嚟求我畀份工你囉，反正你唔做大把人做。同包括本地名牌大學在內嘅老闆以超低薪剝削清潔、保安嘅心態有咩唔同？唉，保安同清潔都就嚟有最低工資保障啦，估唔到依家大學畢業生仲慘過佢哋！

Email：lukchiho75@hotmail.com

Blog：http://lukchiho.blogspot.com

網友觀點……

陳福水：唔通政府覺得依家大學生嘅質素唔值得畀多二千？

學生王子：有志於做公務員嘅大學生係時候諗吓先囉。

掃街茂：減多二千仲好，等佢哋知道搵食艱難，要腳踏實地做嘢！

周仔：以煲呔曾為首嘅公務員形象差劣，就算加多二千我都唔做！