新界鄉議局呢排是非多多，該局副主席兼坪洲鄉委會主席林偉強被爆出涉嫌騙取區議會租金津貼，外間一直盛傳有新界王之稱嘅鄉議局主席劉皇發有意力捧女婿、亦即信和集團董事總經理余漢坤，取而代之，第一個位梗係離島區議會主席一職，尋日問到發叔，呢個「非常外父」講咗句「邊個做得嘢就捧邊個」，唔肯明言係咪捧女婿，余漢坤就話，自己會一步一個腳印去做喎。
發叔尋日出席妙法寺落成典禮活動時話，至今仲未搵到林偉強，講到坊間話佢「力捧女婿」嘅傳聞，發叔就話只係外界揣測，捕風捉影啫，佢仲話「清者自清，濁者自濁」。不過，現任離島區委任議員嘅余漢坤自從做咗發叔女婿後，已經慢慢改變作風，由○八年擔任區議員時嘅非常低調，到近期漸趨高調，早前鄉議局新春團拜，余漢坤就代表信和置業上台移交支票，捐咗一百萬畀鄉議局起新大樓，搶盡風頭。
余漢坤尋日出席公開場合時話，佢涉足政界不過兩年，根本無意爭林偉強個主席位，亦唔會行一步就諗十步之後嘅嘢，佢仲話即使真係有人事變動，都會推舉身為離島區議會副主席嘅周轉香接手，件事點發展實在耐人尋味，外間或者更關注發叔呢個外父响事件中嘅影響力多啲！