港大早兩日先頒授咗個名譽博士榮銜畀星雲大師，尋日星雲大師即刻喺港大陸佑堂講佛偈，吸引近六百名「粉絲」捧場，全院滿座，港大校長徐立之及港大佛學研究中心管理委員會主席李焯芬全部在座，連基本法委員會副主任梁愛詩都京港兩邊飛嚟捧場。
詩姐仲忠心到一連兩日都慕名而來，好似小粉絲咁，佢話，大師講嘢充滿人生哲理，即使唔係佛教徒都好啱聽，佢否認係星雲弟子，咁勤力，全因年前拜讀星雲嘅作品後頗有共鳴，可惜一直冇機會現場聽大師開示，今次機會再來，梗係咪走雞。詩姐話，大師好強調人與人之間相處要和諧，講道夠入世，最受用嗰句係「任何困難總有解決辦法」，好受鼓舞喎。
星雲大師講道已達出神入化境界，雖然手中無講稿，卻可以講足粒幾鐘，依然引來爆笑連場。大師謙稱唔係乜嘢師傅，相反千千萬萬嘅信眾至係佢老闆，因為每次建佛寺，全靠善信慷慨解囊喎。