早前一場四級火奪走咗個消防隊目，消防處同袍發起籌款活動，青年事務委員會主席陳振彬（Bunny）本身係一個廠家，對於呢宗工廠大廈火災深有所感，日前佢主動聯絡消防處處長盧振雄，睇吓有乜可以幫忙，最後決定捐出十萬元予殉職消防隊目家屬，聊表心意。
講番早前佢哋復辦青年高峰會即有青年踩場，甚至有周刊對佢大起底一事，Bunny強調會議完全冇禁止青年入場，喺早上會議開始前，仲親自到場外邀請一班示威青年進場一起參與討論，但佢哋拒絕接受邀請，最奇怪係場內竟然有另一班青年突然喺討論期間舉牌示威抗議，仲搞到掟鞋添，如果真係閉門造車，有人可以掟到鞋咩？
當日一場鬧劇唔單止影響咗參加峰會嘅六百名青年，令一班青年學生花咗成個月籌備嘅努力付諸流水。Bunny計劃遲啲喺青年事委員會上提出成立多個聚焦小組，等青年人可以充分發表意見。