旅遊發展局主席一職到今個月底就約滿，之前傳聞多多，矛頭仲針對富貴黨前主席田北俊冇得再坐，尋日政府刊憲新任命，田少獲續期三年至二○一三年三月三十一日，政府同時出稿讚田少管治成績，呢個遲來嘅公告顯示煲呔曾想換人嘅奸計行唔通，只好不情不願咁遲遲公布，睇嚟，煲呔曾想復仇都搵唔到藉口噃。
煲呔曾同田少早有宿怨，已係政壇公開秘密，○七年初，煲呔曾部署連任，免生火頭，田少先至得以入主原本由黨友周梁淑怡執掌嘅旅發局，事隔三年，煲呔曾依家翹埋雙手等退休，想復仇炒田少嘅心更加熾熱，於是一向同煲呔曾關係友好嘅Jeffrey林健鋒，有意同田少拗手瓜嘅傳聞不脛而走，甚至連海洋公園扮嘢文呢個「不可能人選」都被吹得言之鑿鑿。
不過，政改大戰前夕，Jeffrey如被委任，等如明剃富貴黨眼眉；扮嘢文又續任海洋公園主席，煲呔曾思前想後，惟有放棄復仇。