公社兩黨玩五區辭職搞到一鑊泡，家吓補選提名期仲差十零日，政壇就一片靜英英，建制派政黨大都玩杯葛，曾經被傳會落新東玩一鋪嘅沙田區區議員龐愛蘭（Scarlett）尋日都話，補選嘅議題變咗只講政治、不談民生，已經「唔係佢杯茶」，寧願花多啲心機、精神同時間寫博士論文好過，因為佢讀緊澳洲一間大學嘅工商管理遙距課程。
Scarlett話覺得補選愈嚟愈唔對路，每個出嚟講打算參加補選嘅人，都被兩黨塑造成為「共產黨人」，Scarlett覺得咁樣好無謂，仲話共產黨都冇乜唔好，不過唔想畀人過橋，先決定唔玩呢場補選。其實身為新論壇嘅龐愛蘭都係建制派一員，建制派一致杯葛補選，佢依家放棄參選，都係意料中事。
佢仲透露，近期幫手做緊一套禁毒電影嘅總監，仲會客串一兩場，喺戲中做個十幾歲小朋友嘅媽媽，呢齣戲嚟緊六月就會上畫嘞！