發展局局長林鄭月娥近排好惹火，早前佢拋出強制拍賣物業嘅門檻由九成降至八成後，地產界拍手，舊樓一族就好反對，下個禮拜政府就會提修訂上立法會，日前政圈忽然起風浪，主角竟然係做過高官嘅匯賢智庫立法會議員葉劉淑儀（Regina）向佢口中嘅師妹林鄭月娥叫陣。
前日Regina忽然發功，喺報章登全版廣告，點名叫林鄭「不要搶走窮人唯一嘅小羔羊」，公然話畀人聽佢反對降低舊樓強制拍賣門檻建議，隔咗一日，Regina再隔空批評林鄭對舊樓重建嘅計劃係「只睇到官員嘅時間表，睇唔到小市民嘅利益」，仲諷刺呢啲係「典型坐喺衙門官員嘅回應」。
佢連日咁高調，搞到政圈傳聞多多，有指佢今次出手係因為林鄭同佢本人都被傳係下屆政務司司長大熱，所以提前爆發戰事，Regina話呢啲傳言對佢係侮辱，仲強調唔會同「師妹」（即林鄭）爭位喎。