被點名要削開支

畀泛民點名要削開支、甚至恨不得減佢人工嘅官員中，有唔肯復建居屋而再成箭靶嘅運輸及房屋局局長鄭汝樺（Eva）；亦有教育局局長孫明揚、勞工及福利局局長張建宗同政制及內地事務局局長林瑞麟。飯盒會斟過後覺得，頭三個局近年推出嘅政策完全無助增加社會流動性，令到青年人冇機會向上爬，結果貧者愈貧，富者愈富，認為局長應該問責減薪；至於林公公榜上有名，純粹係因為佢處理政改嘅表現實在太差喇。

Eva近排畀人針對同居屋決定有好大關係，其實政府企硬唔復建居屋可以話係最高層嘅決定，Eva根本係代罪羔羊，但啲冇殼蝸牛嘅怨氣就全部發洩喺佢身上。至於孫公同張建宗，試諗吓鬍鬚曾過去三份預算案大部分都係一次性嘅派糖措施，長遠政策欠奉，上頭唔開水喉，做局長嘅又點敢放膽去做？

不過，累到同事一仆一碌嘅鬍鬚曾就話之你，對民意充耳不聞，對下屬水深火熱嘅環境亦唔理得咁多，尋日出席商界聯席午餐會時，向商界闡釋預算案內容依然一副等收工態度，演講內容幾乎將預算案內容照噏一次，仲出口術話穩定樓市措施唔會一夜之間見效，政府會繼續留意市況，有需要時再推加碼措施，呢啲說話佢噏咗N咁多次，有用得㗎？！