港府受咗香港足球隊東亞運奪冠嘅刺激，突然腳痕落場玩鋪勁，話要全面推動足球發展喎。呢，當局尋日公布《推動本地足球運動顧問報告》，列出咗四十九項建議，要喺五年內令香港足球有顯著改善咁話。

民政事務局局長曾德成話，原則上接納報告嘅主要建議，準備調整政策，進一步支持香港足球發展喎。咦，港府出手相助，香港以後唔使再做魚腩部隊喇啩？

水頭足唔足先？嗱，二○一○至二○一一年港府畀足總嘅撥款係九百萬，顧問建議未來五年投放七千五百萬至一億，用於改革足總同加強青少年球員培訓。其他建議仲包括，由民政事務局設立一個足球專責小組監督建議嘅實施、成立足球訓練中心培養新人、成立新嘅職業足球聯賽同開辦足球學校、增加球場供應同提升場地質素等等。

講到呢個「五年計劃」嘅目標仲巴閉，依家香港隊喺國際足協排名第一百四十三，當局話五年內要打入一百強，仲話要備戰參加中國超級聯賽添。

叮！政府都算數口精咯。平均一年投放得嗰千幾二千萬，五年內就要香港足球脫胎換骨。咁嘅如意算盤如果打得響嘅，香港足球隊就唔使好似上個月東亞盃咁，成日喺國際賽事做「三零部隊」啦。

政府扶持足球發展冇人會反對，香港足球的而且確曾經威盡亞洲，出過李惠堂呢啲球王，亦參加過世界級賽事。以前喺世界盃亞洲區外圍賽，往往能夠打入分組賽第二輪，就算唔係最強，亦絕對唔會好似今日咁，贏波只係曇花一現，做魚腩反而係常態。

政府發展足球好似過往對其他運動項目咁，純粹係趕時髦。三分鐘熱度過咗，乜都搞唔成，又係得個噏字。發展體育講究長期投入，正如浸會大學學者話齋，好多建議本地足球圈中人十幾年前已提出過，呢次不過係炒冷飯，擔心港府又係「得個講字」。

叮！畫公仔唔使畫出腸啦，如果唔係港隊上次爆冷喺東亞運靠互射十二碼險勝日本隊，歷史性奪金，呢個一向功利嘅政府，根本唔會對香港足球發展咁上心，更加唔會好似食咗成擔大頭菜咁，發埋啲不切實際嘅白日夢。

睇番呢幾十項建議，樣樣都要長期同足夠嘅資源投入至收到效，港府呢次擺明又係煞有介事做下門面工夫，敷衍市民，自己攞彩，第日又不了了之。增撥資源得雞碎咁多，發展足球唔使諗啦，攞嚟吹爆氣球仲差唔多。叮！