小白觀點：應派頭盔兼住禮賓府

菲律賓旅行團畀人賣豬仔，反而受到上賓式嘅款待，上山頂食大餐、去香港仔遊船河，吃喝玩樂多采多姿，隨時仲爽過原本跟嗰團，咁好玩嘅豬仔團，我都想參加呀。記得當日國內同胞落難冇人理之餘，仲要畀唐唐膶句「條條Fing」，嗱，呢啲咪叫做同人唔同命囉，真係唔恨得咁多。

既然係要令菲律賓旅客賓至如歸，咁嘅服務係未夠嘅。你知啦，香港治安不靖，有個泰國女遊客諗住嚟迪士尼玩，竟然魂斷稅務大樓；仲有呀，印尼、菲籍人士應該係流年不利，虎年新正頭不知撞低咗幾多個印、菲女傭。所以如果菲律賓旅行團要出遊，派十架八架警車開路都未夠，再每人一個G4貼身保護，並且派發軍隊規格嘅頭盔防鏹彈就差唔多。至於住宿咯喎，反正煲呔曾成日周圍浮，一於住埋入禮賓府，咁就名副其實禮「賓」嘞。

Email：sunsiupak@gmail.com

Blog：http://sunsiupak.blogspot.com

阿豪觀點：獨特卸膊文化深度遊

一個有二十四名菲律賓人的港澳旅行團，日前傍晚抵達赤鱲角機場後，團員發覺冇本港旅行社代理接機，一行人滯留機場慘變「豬仔團」。不過呢班團友因禍得福，獲升級安排遊覽山頂等名勝，仲去香港仔歎海鮮添。

嘿嘿，話明旅遊，最重要梗係體驗當地文化同風土人情啦，如果咁計，呢班菲律賓朋友今次真係賺突。第一，畀佢哋見識到中國人呃人嘅厲害！如果去埋內地旅遊，肯定仲有機會見識博大精深嘅「化學品飲食文化」添呀！第二，就係可以體會香港官府嘅卸膊文化。香港負責旅遊嘅部門唔少㗎，可惜出事後個個你眼望我眼，最後要由議員協助先至叫做擺平事件。

不過菲律賓政府都有責任，如果佢哋多啲睇吓本報，自然會清楚了解上述嘅衰嘢，睇怕一早發咗旅遊警報啦！

Email：lukchiho75@hotmail.com

Blog：http://lukchiho.blogspot.com

網友觀點……

甘仔：咁有人情味，唔知有冇幫佢哋喺度搵埋工呢？

陸克文：賣豬仔團獲如此款待，睇怕陸續有來。

賓仔：班團友返去宣傳吓，香港實成為佢哋外遊嘅首選。

馬可B：豬仔團變豪華團，又提供大量就業機會，香港真係菲人嘅福地！