政府早前向立法會提出俗稱「強拍條例」嘅《土地（為重新發展而強制售賣）（指明較低百分比）公告》，建議將強行拍賣舊樓嘅業權份數門檻，由現時嘅九成放寬到八成，希望可加快市區重建進度，畀泛民主派同部分舊樓小業主質疑政府咁做係明益私人發展商同犧牲小業主權益，但似乎未能引起社會廣泛討論。
直至負責審議該項公告嘅立法會小組委員會上禮拜一喺未經預告下，通過一項冇法律約束力嘅動議，要求政府撤回整條強拍條例，社會嘅討論先熱烈番些少。最有趣嘅係，呢次突襲行動唔係由泛民策動，而係由分屬建制派嘅葉劉淑儀提出，佢日前仲事先張揚會刊登全版報紙廣告唱衰今次修例，揚言要「同煲呔曾玩鋪勁」。
呢版廣告尋日出街，但隻字不見「煲呔曾」，反而「林局長」個名出現咗八次咁多，矛頭直指「好打得」嘅發展局局長林鄭月娥，仲引用咗《聖經》撒母耳記下嘅著名比喻，指摘林鄭只顧方便發展商收樓，搶咗窮人唯一擁有嘅一隻小母羔羊，令佢哋變成一無所有，內容好有針對性。
老實講，政府早已為修例數夠票，葉劉呢次咁高調嘅舉動，簡單啲諗係為增加曝光，陰謀啲就難免令人聯想佢係咪另有政治盤算。到底葉劉今次開邊瓣？真係得佢自己先知。