校長唐偉章尋日出席理大新教學酒店平頂儀式時，一見到記者就笑笑口咁話：「呢排畀你哋搞到好唔得閒！」完咗典禮仲自動自覺行到記者面前接受訪問，首度開腔回應事件，話調查小組會檢討理大嘅招標程序、財政狀況，又會調查理大附屬公司嘅運作同提升透明度，如果審計署真係展開調查，校方都會全力配合，有需要時或會同前校長潘宗光會面。

唐校長話校方非常重視呢件事，已經成立咗專責小組調查，預計三個月內有結果，仲好似心口有個勇字咁，拍心口話若然證實校方有錯，校方會承認錯誤，積極諗吓改善做法，一定唔會有所隱瞞。

至於理大舊年虧蝕逾五億元，唐校長話主要因為投資失利，金融風暴殺埋身大家都唔想，今年要視乎各部門嘅資源夠唔夠，如果有需要，可能會裁減教職員，但涉及嘅人數好少，幾十個都冇喎，希望大家放心。