星雲大師當年有份協助前新華社香港分社社長許家屯逃亡到美國，曾經轟動一時。星雲大師尋日話已經係二十幾年前嘅事，許家屯今日係一個九十幾歲嘅老人家，希望社會各界可以祝福佢。對於被外界冠以「政治和尚」嘅稱號，大師唔介意，仲好玄咁話：「外界說我做政治和尚很好，說我是教育和尚也很好，說我是媒體或弘揚佛教的和尚也可以；像我這樣的人，你怎樣說也可以。」

大師又形容兩岸嘅關係就好似兩兄弟咁：「香港、台灣、澳門和中國不是兩個，是一個，都是一家人。」佢對香港印象非常好，形容香港係一顆充滿人才嘅珍珠。

同樣獲頒名譽博士學位嘅仲有「電器大王」蒙民偉前妻楊雪姬，囡囡蒙倩兒、囝囝蒙德揚同較少露面嘅蒙得勳都現身撐媽咪。蒙德揚話近年媽咪行動不便，平時好少出街，完咗儀式後一家人會返屋企食飯慶祝。