話說政府年中將推出「共同護理計劃」，三年內逐步資助全港二萬名喺公立醫院求醫嘅高血壓同糖尿病患者睇私家醫生。醫管局吹水唔抹嘴，將個計劃講到天上有、地下無，話唔單止為長期病患者提供額外服務選擇，為病人帶來更多彈性同方便，仲可以推廣家庭醫生概念，建立醫生同病人良好關係咁話。

現時公營門診日日逼爆，睇醫生要排長龍，淨係攞藥就等成粒鐘。有錢嘅話，梗係睇私家醫生好過啦，有頭髮邊個想做瘌痢噃。依家政府貼錢畀病人睇私家醫生，一定大受歡迎啫。

之不過，睇清楚個計劃之後，就笑唔出聲喇。原來每名病人每年只獲資助千二蚊醫療券，加上二百蚊獎金，一共只有千四蚊咁大把。而高血壓同糖尿病都係長期病患，每年起碼要覆診四次，如果睇私家專科醫生，每次最少六百蚊，貴啲嘅，分分鐘過千蚊。即係話，政府資助嘅醫療券，夠畀診金就唔夠買藥，每睇一次醫生，病人都要自己貼錢。大佬，咁叫做資助咩？係打市民荷包至真。叮！

家陣醫管局資源錯配，前線醫生人手短缺，醫療事故多多。食衞局局長周一嶽等高官既想減輕醫生工作量，又唔想增撥資源增加人手，度埋晒啲縮骨計仔將病人推出去，就關人個關。

其實，正如有業界人士話齋，長期病患者喺公營門診睇醫生，每次治療成本都要六百蚊，依家政府攞雞碎咁多出嚟資助，邊度有吸引力呀。講到底，咪又係政府出豉油，病人出雞囉。講到諗縮數，周一嶽認第二，真係冇人敢認第一。

話時話，將公立醫院病人外判，已經唔係第一次嘞。當日派發長者醫療券，講得好聽啲係敬老，其實咪又係將啲病人推畀私家醫生。不過當局鬼死咁孤寒，每名長者一年先至派二百五蚊醫療券，剝隻牙嘅錢都唔夠，卒之變咗大笑話。

講真，醫管局咁樣做，實在令人費解，庫房又唔係冇水，使唔使咁孤寒呀？香港位列全球十大最富裕地區，不過公營醫療開支只佔GDP不足百分之三，係其他發達地區相關比例嘅三分一。所以就算將公共醫療開支增加一倍都唔算過分，使乜將病人推出去噃。公共醫療關乎市民健康，應使嘅錢就要使，唔通留番晒嚟為公務員加人工咩？