辭咗立法會議員個位後，Tanya陳淑莊收入大減，人前人後經常呻窮，但講到扮靚，步入「中女」之列嘅佢就話唔慳得。佢自爆用闊太至愛嘅Cle de Peau Beaute護膚，又隔日食六十蚊粒嘅紫雲赤芝補身，開支唔嘢少。
Tanya尋日開咪，畀主持人問到何解做極唔殘，秘訣原來係四部曲。佢話最緊要每日瞓足七粒鐘，再善用禮拜六晏晝午睡叉電；最後兩部曲，就係用靚嘢護膚，同埋食補品調理身體。Tanya鍾情日本Shiseido最頂級系列Cle de Peau Beaute，掃齊全線護膚品。
呢個牌子售價不菲，齋買一支保濕乳液都要八舊幾水。佢年前再喺朋友介紹下「啪丸」，服食一粒混和紫芝、雲芝同赤芝成分嘅膠囊，內外夾攻下果然皺紋都唔多條。