本文重點
香港大律師公會啱啱換屆，上任主席高浩文喺冇對手之下成功冧莊。尋日佢帶埋班新嘅執委出嚟見記者，對於敏感嘅政治議題例如《基本法》第二十三條立法同埋立法會五區補選，佢實行唔撐、唔踩，保持公會嘅專業、中立形象。
補選投唔投票賣關子
高浩文被問到二十三條立法嘅問題時，話呢個係政府嘅憲制責任，而公會並非政治團體，所以只着眼法律條文，若然港府真係立法，公會會睇清楚法例條文然後畀意見。至於會唔會好似○三年咁上街，佢話依家言之尚早，只係希望政府立法嘅時候可以吸取○三年嘅教訓。
近期政圈話題仲有愈搞愈冇聲氣嘅所謂變相「公投」，高浩文認為任何人都可以自行將呢場補選講成任何嘢，補選結果亦任君演繹，總之只係一場補選。
至於會唔會喺補選投票，佢笑笑口向大家賣個關子就算，可見佢答得幾咁小心。