斷人財路遭杯葛

原來有人聽到係食物及衞生局局長周一鑊出手阻撓，話想等到將來正式公布自願性醫保方案之後，先一併落實有關建議，而且只有經政府認可嘅醫保計劃至可以扣稅，藉此增加政府方案嘅吸引力，但係呢個舉動斷絕一眾私營保險公司同保險從業員嘅財路，業界想唔㷫都幾難！

周一鑊唔單止經常孭鑊，仲好似辣椒醬咁周圍辣人。上禮拜四佢接受電台訪問時，就公開質疑私營保險公司食水深，並威脅會由政府自組保險公司推行自願性醫保，直接同業界搶飯食，本港各大保險公司同從業員代表終於忍無可忍，決定集體杯葛原定喺呢個禮拜同副局長梁卓偉嘅會面，以示對政府不斷抹黑業界嘅強烈不滿。

立法會保險界代表陳健波接受查詢時承認，業界同食衞局嘅溝通根本上已斷絕咗，日前梁卓偉搵佢做和事老，佢盡咗好大努力，先勸服業界重返談判桌，但指明一定要直接見周一鑊，唔排除會當面鬧爆對方或要求正式道歉。