轉任九巴及龍運非執行董事將近兩年嘅馬會主席阿John陳祖澤，一心專注馬會工作，間中都會約吓朋友食飯，好似尋日就約咗九巴董事總經理何達文去食晏。雖然唔知道兩位新舊董事長傾過啲乜，但每年呢個時候大家都談論加人工，問到九巴同馬會有冇得人工加時，阿John同何達文就異口同聲話：「呢啲遲啲先至傾！」
如果大家有留意，阿John出入都帶住個意大利a.testoni小型手提公事包，莫非會為佢帶嚟好運兼袋多啲錢？佢笑笑口咁話大家有所不知，佢咁耐出街都唔用現金嘅，平時買嘢食飯用信用卡，喺馬會投注就用投注寶按機，銀行過數搞掂。咁都冇理由一毫子都唔帶啫！佢就話：「平時咪袋廿蚊出街囉，好似小學生袋零用錢咁！」
