民主阿婆頭上嘅政治光環早就褪晒色，但總喺度自以為是。為咗幫公文袋同社民連策動嘅變相「公投」造勢，佢最近又再成日公開露面，噏三噏四博見報，最近一次仲燒到范太身上，尋日終於畀范太同工聯會會長鄭耀棠窒番轉頭，仲連摑佢兩巴掌。

身在北京嘅范太強調自己係做應該做嘅事，依書直說，並非為自己嘅利益，問心無愧，又話日前覆述習近平嘅說話，唔係中央叫佢傳話，佢亦唔會為任何人傳話。言下之意，即係暗寸民主阿婆無中生有，專係撩是鬥非。

棠哥睇唔過眼 斥挑撥離間

身兼行政會議成員嘅港區全國人大代表棠哥，見范太畀人咁樣誣衊法，亦忍唔住寸爆民主阿婆。棠哥話，唔該民主阿婆唔好再玩挑撥喇，香港有言論自由，但亦好需要和諧。擺明係窒民主阿婆挑撥離間，惟恐天下不亂。

范太同棠哥齊齊發炮，反映傳統愛國愛港陣營有共識，明知民主阿婆要為公社兩黨嘅變相「公投」造勢，惡意散播抹黑親中人士言論，所以一有動靜，范太同棠哥就即時出嚟撲火，將呢啲惡毒謠言撲滅於萌芽。亦由此可見，人大、政協「兩會」期間，差唔多成個傳統愛國愛港陣營移師北京，但係收風嘅強勁天線開到行，民主派有乜依郁，全部了然在胸，隨時第一時間反擊！

民主阿婆今次畀范太同棠哥明嘲暗寸，都可以話係自食其果，但以佢嘅性格，唔會輕易罷休。變相「公投」大戰只係啱啱起步，民主阿婆已經狼相盡現，見人就咬，去到補選衝刺期嘅真正埋牙肉搏階段，佢肯定更加瘋狂，到時睇吓建制派點樣治佢！