小白觀點：冇糧出可派果奶燒米餅
真人不露相，弱台做乜都唔掂，原來搞麻甩版金枝慾孽最得，真係估佢唔到。對於一般觀眾嚟講，呢場戲確係近年難得佳作，不過該台嘅員工就真係有得震冇得瞓。
因為根據一般街頭罵戰嘅經驗，到咗呢個時候，兩邊都覺得自己啱晒，總會周圍搵人主持公道，睇吓邊個啱邊個唔啱。所以唔好話本欄唔單聲，喺呢間電視台打工要做足心理準備，當有日要大家搞公投表態，千祈唔好企錯邊呀，中國歷史話畀我哋知，押錯注嘅通常冇乜好收場。
你知啦，一直有傳呢間電視台成日冇水，曾經一度差啲冇糧出，要高層周圍撲水至捱得過，所以如果我係員工之一，當然會企喺「吃人夠夠」嗰邊啦，事關有朝一日冇人工出，都可以派果奶同燒米餅頂住三幾個月，一家大細三餐都尚算有着落吖嘛。
Email：sunsiupak@gmail.com
Blog：http://sunsiupak.blogspot.com
阿豪觀點：互片連續劇吸師奶粉絲
亞視兩個股東互片，老實講，真係好好睇，呢單嘢睇嚟仲有排玩，大家不妨繼續留意事態發展。豪伯覺得，亞視之前決定唔再自己拍劇，實在非常明智，家陣呢套劇如果搬上電視螢幕，收視一定爆硬！
係喎，早排唔係有商人揚言要將亞視打造成亞洲嘅CNN嘅咩？認真大想頭，知唔知人哋CNN係點樣起朵㗎？當年九一年波斯灣戰爭爆發，CNN作為一個創立十年左右嘅新媒體，佢哋全天候喺現場報道，就係咁成功吸引全球嘅目光。香港嘅電視台要喺國際出名，睇怕要等到解放軍揚我國威於南海至得嘞！
至於會唔會等到呢一日，咁就認真考起豪伯，不如咁啦，喺未有戰地現場報道之前，都係全天候滾動式播住股東互片連續劇先，做唔到CNN，穩定一班師奶固定粉絲都好吖，起碼叫做拉近吓同對手嘅距離嘛！
Email：lukchiho75@hotmail.com
Blog：http://lukchiho.blogspot.com
網友觀點……
龍劍飛：呢個題材亞視拍過好多次啦，冇厘新意，不如拍套講電視台執笠嘅劇仲好啦！
周仔：睇完立法會鬧劇，依家又嚟多場電視台鬧劇，真胡鬧！
犀利叔：亞視高層一向新聞多多，知名度絕對大過班藝員！
吃人夠夠：有內鬥又有老闆教台語，呢套簡直係亞視代表作！